Speansais aistrithe agus athlonnaithe
Féadfaidh sé go mbeidh ar d'fostaí dul chun chónaí in áit éigin eile chun dualgais a bhfostaíochta a chomhlíonadh. Féadfaidh tú costais aistrithe agus athlonnaithe an fhostaí a aisíoc, saor ó cháin, má bhíonn costas ar d'fhostaí as:
- aistriú go láthair nua fostaíochta
- gabháil i mbun na fostaíochta.
Beidh na costais sin saor ó cháin i gcás:
- go mbíonn costais iarbhír aistrithe agus athlonnaithe ann
- go mbíonn na costais réasúnta
- go ndéanfar rialú ceart ar íocaíocht na gcostas
- go mbíonn gá leis an aistriú.
Costais saor ó cháin
Ní fhéadtar costais a aisíoc saor ó cháin ach amháin sa chás go n-eascraíonn siad go díreach as an aistriú cónaithe. Áirítear leo seo:
- táillí ceantálaí, táillí dlíodóra agus dleacht stampála a thagann chun cinn de bharr an aistrithe cónaithe
- troscán agus nithe eile a aistriú amach
- táillí stórála
- árachas ar throscán agus ar nithe eile faoi bhealach nó i stóras
- glantachán ar throscán stóráilte
- costais taistil ar aistriú amach don fhostaí.
Cothabháil
Féadfaidh tú costais chothabhála a íoc le d'fostaí saor ó cháin i gcúinsí áirithe.
Féadfaidh tú liúntas sealadach cothabhála a íoc leis an bhfostaí agus iad ag lorg lóistín san áit nua. Is le haghaidh deich n-oíche ar a mhéad a chlúdóidh an íocaíocht seo, ar rátaí nach mó iad ná na rátaí reatha Státseirbhíse. Ní gá admhálacha a sholáthar chun an íocaíocht sin a dhearbhú.
Féadfaidh tú cíos ar lóistín sealadach a íoc don fhostaí freisin ar feadh tréimhse nach faide ná trí mhí. Ní mór admhálacha a sholáthar chun an íocaíocht sin a dhearbhú. Ní ceadmhach duit an costas seo agus an liúntas sealadach cothabhála araon a íoc leis an bhfostaí ag an am céanna.
Costais nach bhfuil saor ó cháin
Níl na costais seo a leanas saor ó cháin:
- aon chuid den chostas caipitil a ghabhann le teach a cheannach nó a thógáil
- aon ús ar iasacht idirlinne, nó aon iasachtaí don fhostaí chun ceannach nó tógáil tí a mhaoiniú.
Ní fhéadfar íocaíochtaí saor ó cháin a dhéanamh ach ar chostais iarbhír arna dtabhú tráth an aistrithe agus orthu sin amháin.
Tuarastal atá in airgead corraíola, mar sin is cóir cáin a ghearradh air.
Taifid nach mór a choinneáil
Ní mór gach taifid a bhaineann le costais aistrithe agus athlonnaithe íoctha agat a choinneáil ar feadh sé bliana.