Easpórtálacha

Chun críocha Cánach Breisluacha (CBL), is easpórtálacha iad earraí a sheoltar díreach chuig ceann scríbe taobh amuigh de limistéar CBL an Aontais Eorpaigh (AE).

Tagraíonn an téarma 'limistéar CBL an AE' don AE, ach amháin i gcás críocha áirithe eisiata, nach meastar a bheith mar chuid den AE chun críocha CBL

Tá tuilleadh eolais ar na críocha eisiata seo ar fáil faoi Treoir Bhreise.

Cén ráta CBL a fheidhmítear ar easpórtálacha?

Feidhmítear ráta nialasach CBL:

• soláthairtí earraí a iompraíonn soláthraí go díreach nó a iompraítear thar ceann soláthraí chuig ceann scríbe taobh amuigh de limistéar CBL an AE.
• ar sholáthairtí earraí atá le seoladh nó le hiompar go díreach taobh amuigh de limistéar CBL an AE ag ceannaitheoir na n-earraí nó thar a gceann, sa chás go bhfuil an ceannaitheoir úd bunaithe taobh amuigh den Stát.

Fianaise ar easpórtáil earraí le haghaidh CBL

Ní mór do sholáthraí na n-earraí easpórtáilte a chinntiú gur fhág na hearraí an AE.

D'fhéadfaí na nithe seo a leanas a mheas mar fhianaise gur fhág na hearraí AE:

• Nuair a úsáideann gnólacht a gcuid feithiclí féin chun earraí a iompar taobh amuigh den AE, meastar gur easpórtáil earraí é seo. San áireamh sa chruthúnas gur fhág earraí an AE bheadh an teachtaireacht um fhógra easpórtála (IE599) a eisíodh chuig an easpórtálaí.
• Sa chás go ndéanann iompróir a ghníomhaíonn thar do cheann earraí a easpórtáil ar bord loinge, ba chóir cruthúnas easpórtála a fháil ón gcuideachta loingseoireachta. Mar chuid de chruthúnas gur fhág earraí an AE, d'fhéadfadh cóip den bhille luchta, deimhniú lastais nó fógra lastais a bheith san áireamh.
• Sa chás go ndéanann iompróir a ghníomhaíonn thar do cheann earraí a easpórtáil ar aerárthach, ba chóir cruthúnas easpórtála a fháil ón aerlíne. Mar chuid de chruthúnas gur fhág earraí an AE, d'fhéadfadh cóip shínithe den bhille aeriompair, le sonraí eitilte luaite ann a bheith san áireamh.
• Sa chás go n-easpórtálann tú earraí tríd an bpost, ba chóir deimhnithe postála a fháil ón bpostoifig óna seoltar iad. Má tá postleabhar á úsáid agat, ba chóir go ndéanfaí é a stampáil i gceart ag oifigeach ón bpostoifig óna seoltar iad.

I ngach cás, ní mór ainm iomlán agus seoladh iomlán an choinsíní a bheith le feiceáil go soiléir.

Easpórtálacha chuig comhlachtaí idirnáisiúnta áirithe

Féadtar caitheamh le soláthar earraí nó seirbhísí do chomhlachtaí idirnáisiúnta áirithe mar easpórtálacha.

Ní mór do na soláthairtí cloí leis na teorainneacha agus coinníollacha arna leagan síos ag na gcoinbhinsiúin lena mbunaítear na comhlachtaí. Féadfaidh sé go mbeidh teorainneacha agus coinníollacha breise  leagtha amach tríd na comhaontuithe idir ceanncheathrú na gcomhlachta sin agus Ballstát óstach na ceanncheathrú.