Díolúintí agus faoisimh

Faoisimh d'fheirmeoirí

Faoiseamh i leith Gaol Fola

Ní bhaineann an faoiseamh seo ach le haistrithe talún. Chun an faoiseamh seo a éileamh, ní mór duit:

• a bheith gaolta leis an aistreoir
• agus
• a bheith i mbun feirmeoireachta ar an talamh ar feadh sé bliana ar a laghad nó an talamh a ligean ar léas ar feadh sé bliana ar a laghad do dhuine a dhéanfaidh feirmeoireacht air.

Má tá tú i mbun feirmeoireachta ar an talamh, ní mór:

• a bheith cláraithe do Cháin Ioncaim
• cáilíocht shonraithe a bheith agat nó ceann a fháil taobh istigh de thréimhse ceithre bliana ón dáta a fhaigheann tú an talamh
• nó
• ar a laghad 50% de do chuid ama a chaitheamh i mbun feirmeoireachta ar an talamh (an t-aistriú talún seo san áireamh).

Má ligeann tú an talamh ar léas do dhuine eile chun feirmeoireacht a dhéanamh, ní mór don duine sin:

• cáilíocht shonraithe a bheith aige nó aici nó ceann a fháil laistigh de cheithre bliana ón dáta a fuair tú an talamh
• nó
• ar a laghad 50% dá gcuid ama a chaitheamh i mbun feirmeoireachta ar an talamh (an t-aistriú talún seo san áireamh).

Faoiseamh d’Fheirmeoirí Óga Oilte

Chun an faoiseamh seo a éileamh, ní mór duit:

• a bheith faoi bhun 35 bliana d'aois ar an dáta a forghníomhaíodh an t-aistriú talún
• cáilíocht talmhaíochta ábhartha a bheith agat, nó cáilíocht a fháil laistigh de 3 bliana ón dáta a fhaightear an talamh (baineann tréimhse ama 4 bliana le haistrithe a rinneadh roimh an 15 Bealtaine 2023)
• plean gnó a bheith curtha faoi bhráid Teagasc agat
• a bheith cláraithe do Cháin Ioncaim
• agus
• a bheith i gceannas ar an ngabháltas feirme.

Freisin, ní mór go mbeadh sé i gceist agat:

• ar a laghad 50% de do ghnáth-am oibre a chaitheamh ag feirmeoireacht na talún aistrithe
• agus
• úinéireacht a choinneáil ar an talamh sin

ar feadh tréimhse cúig bliana ar a laghad ó dháta an aistrithe.

Cúnamh Stáit de chuid an AE is ea an faoiseamh. Baineann srianta le méid an fhaoisimh a fhéadtar a éileamh. Baineann an díolúine seo le hionstraimí a fhorghníomhaítear ar an 1 Eanáir 2019 nó dá éis.

Tabhair do d'aire go mbeidh éilimh aisíocaíochta Feirmeoirí Óga Oilte (Alt 81AA SDCA 1999) ag bogadh chuig ríomh-Aisíocaíochtaí go luath.  Beidh tuilleadh eolais ar fáil sna seachtainí amach romhainn.  Idir an dá linn, féadtar leanúint de na haisíocaíochtaí seo a éileamh trí thuairisceáin Dleachta Stampála a leasú.  Féadtar leanúint de fhaoiseamh d'Fheirmeoirí Óga Oilte a éileamh tráth a bhfuil tuairisceáin á thíolacadh.

Faoiseamh i leith Comhdhlúthú Feirme

Chun an faoiseamh seo a éileamh, ní mór duit a bheith i d’fheirmeoir, is é sin duine aonair nach gcaitheann níos lú ná 50% de ghnáthama oibre i mbun feirmeoireachta.

Má tá tú ag ceannach mar chomh-úinéir, ní gá ach do dhuine agaibh a bheith in bhur bhfeirmeoir.

Ní mór duit:

• talamh a dhíol agus talamh eile a cheannach chun do ghabháltas a chomhdhlúthú laistigh de 24 mí
• agus
• deimhniú um chomhdhlúthú eisithe ag Teagasc a bheith agat.

Freisin, ní mór go mbeadh sé i gceist agat:

• úinéireacht na talún a choinneáil.
• agus
• an talamh a úsáid le haghaidh feirmeoireachta ar feadh tréimhse cúig bliana ar a laghad ón dáta a éilíonn tú an faoiseamh.

Ní mór na hionstraimí a chuireann an díol agus an ceannach i bhfeidhm a fhorghníomhú ar an 1 Eanáir 2018 nó dá éis agus roimh an 31 Nollaig 2025.

Íocann tú Dleacht Stampála ar an difríocht idir an praghas a dhíol tú talamh air agus an praghas ar cheannaigh tú talamh eile air.

Faoiseamh i leith léasanna talún feirme

Chun an faoiseamh seo a éileamh, ní mór duit:

• cáilíocht shonraithe a bheith agat nó ceann a fháil taobh istigh de 4 bliana ó dháta an léasa
• nó
• ar a laghad 50% de do chuid ama a chaitheamh i mbun feirmeoireachta ar an talamh (an t-aistriú talún seo san áireamh).

Ní mór an léas:

• a fhorghníomhú ar an 1 Iúil 2018 nó dá éis
• agus
• a bheith le haghaidh tréimhse 6 bliana ar a laghad ach nach faide ná 35 bliain.

Cúnamh Stáit de chuid an AE is ea an faoiseamh. Cuireann sé seo teorainn ar shuim an fhaoisimh a fhéadtar a éileamh.

Le haghaidh tuilleadh eolais, féach an rannán Treoir bhreise.

Ar aghaidh: Aistrithe idir céilí agus idir páirtnéirí sibhialta