Aisíocaíochtaí, faoisimh agus díolúintí

Cén chaoi le haisíocaíocht a éileamh

Más tú an duine a thíolaic an tuairisceán Dleachta Stampála bunaidh (tíolaiceoir bunaidh) ba chóir duit an amend the return tríd Seirbhís ar Líne na gCoimisinéirí Ioncaim (ROS). Taispeánfar ar an tuairisceán leasaithe suim na haisíocaíochta atá dlite. I gcás an Fhaoisimh i leith Comhdhlúthú Feirme, ná déan dearmad an tsuim sa réimse ‘Comaoin’ ar an tuairisceán a athrú go dtí an tsuim inmhuirir.

Ba chóir duit ansin teagmháil a dhéanamh leis an Oifig Náisiúnta um Dhleacht Stampála chun an aisíocaíocht a éileamh.

Mura tú an tíolaiceoir bunaidh, ach gur tú an duine cuntasach, féadfaidh tú:

• cur isteach ar an aisíocaíocht thú féin
• nó
• duine eile seachas an tíolaiceoir bunaidh a ainmniú (ainmní) chun an aisíocaíocht a éileamh ar do shon.

Ba chóir duitse, nó do d’ainmní teagmháil a dhéanamh leis an Oifig Náisiúnta um Dhleacht Stampála chun an aisíocaíocht a éileamh. 

Céard ba chóir a chur san áireamh i d’éileamh aisíocaíochta

San éileamh ar aisíocaíochta, ba chóir duit an méid seo a leanas a chur san áireamh:

• An chúis a gcreideann tú go bhfuil aisíocaíocht dlite.
• Cóip dheimhnithe den ionstraim bhunaidh (doiciméad i scríbhinn).
• Gach doiciméad ábhartha.
• Aitheantas an doiciméid faoinar tíolacadh an tuairisceán Dleachta Stampála bunaidh.

Má tá tú i d’ainmní, ba chóir duit freisin údarú an duine chuntasaigh a chur san áireamh le go bhféadfaidh siad gníomhú thar do cheann.

Chun eolas a fháil faoi céard atá le cur san áireamh le d'éileamh, féach Aisíocaíocht Dleachta Stampála i gcás ina n-úsáidtear talamh le haghaidh forbairt chónaithe (S83D).

Aisíocaíochtaí i leith ionstraimí neamhbhailí nó curtha ó mhaith

Féadfaidh tú aisíocaíocht a éileamh mar gheall go bhfuil, mar shampla, an ionstraim:

• neamhbhailí
• go bhfuil earráid ann a chiallaíonn nach bhfuil sé oiriúnach don fheidhm bhunaidh a bhí beartaithe.

Ba chóir duit an méid seo a leanas a chur san áireamh le d’iarratas aisíocaíochta:

• An chúis a gcreideann tú go bhfuil an ionstraim neamhbhailí nó curtha ó mhaith.
• Cóip den ionstraim.
• Gach doiciméad ábhartha.
• Deimhniú nach bhfuil aon imeachtaí dlí ar bun inar tugadh, inar tairiscíodh nó ina bhféadfaí an ionstraim a thabhairt mar fhianaise.
• Na cúiseanna nach raibh na daoine ar aistríodh an mhaoin chucu in ann a dteideal don mhaoin a chlárú.
• Aitheantas doiciméid an Tuairisceáin Dleachta Stampála a tíolacadh i leith na hionstraime bunaidh.

Má tá cánacha eile dlite le híoc agat

Féadfaidh na Coimisinéirí Ioncaim suim na haisíocaíochta Dleachta Stampála atá dlite duit a fhritháireamh in aghaidh cánacha eile atá dlite le híoc agat. 

Má dhiúltaíonn na Coimisinéirí Ioncaim d’éileamh

Má dhiúltaíonn muid d’éileamh, cuirfidh muid ar an eolas thú faoin bhfáth. Tá an ceart agat achomharc a dhéanamh i gcoinne diúltú d’éilimh leis an gCoimisiún um Achomhairc Chánach (TAC).

Ar aghaidh: Conas faoiseamh nó díolúine a éileamh