Ag ullmhú do Cholún a Dó

I measc rialacha Cholún a Dó tá Riail maidir le Cuimsiú Ioncaim (RCI) agus Riail maidir le hÍocaíochtaí Faoi Thearc-Cháin (RÍFTC). Ceadaíonn an riail do dhlínsí Cáin Bhreisiúcháin Náisiúnta Cháilithe (CBNC) a thabhairt isteach. Foráiltear sa reachtaíocht i gCuid 4A den Acht Comhdhlúite Cánacha 1997 (TCA 1997) do thrí cháin:

1. Cáin bhreisiúcháin RCI.
2. Cáin bhreisiúcháin RÍFTC.
3. Cáin bhreisiúcháin náisiúnta.

Mar gheall ar chastacht rialacha Cholún a Dó, tá sé tábhachtach tuiscint a fháil ar an gcaoi a mbaineann na rialacha seo leat mar eintiteas laistigh den raon feidhme. Cabhróidh na céimeanna thíos leat ullmhú do chomhlíonadh Cholún a Dó. Níl na céimeanna seo uileghabhálach agus ní chuimsíonn siad na nithe go léir a chaithfidh tú a chur san áireamh maidir le conas a bhaineann rialacha Colún a Dó leat.

1. Déan cinneadh an bhfuil an grúpa fiontair ilnáisiúnta (MNE), an grúpa mórscála intíre, nó an t-eintiteas neamhspleách, faoi raon feidhme rialacha Colún a Dó.
2. Oibrigh amach má tá feidhm le forálacha tearmainn nó díolúintí.
3. Sainaithin sonraí airgeadais agus cánach a theastaíonn chun an tuairisceán faisnéise cánach breisiúcháin a chomhlánú. Sainaithin cén eintiteas sa ghrúpa MNE, nó sa ghrúpa mórscála intíre, atá chun an tuairisceán a thíolacadh.

Sainmhíniú

Is éard is 'foráil tearmainn' ann ná foráil a mhaolaíonn an t-ualach riaracháin ar ghrúpaí laistigh den raon feidhme, go háirithe sa tréimhse tosaigh de chur chun feidhme  rialacha Cholún a Dó.

Molann na Coimisinéirí Ioncaim duit clár d'eintitis Cholún a Dó laistigh de do ghrúpa a choinneáil. Cabhróidh sé leat oibleagáidí comhlíontachta cánach agus tíolactha a aithint maidir leis na nithe seo a leanas:

• Máthaireintitis Deiridh.
• Comheintitis.
• Comhfhiontair.
• Eintitis áitiúla ainmnithe.
• Eintitis tíolactha ainmnithe.

Cáin bhreisiúcháin a ríomh

Ba chóir duit na céimeanna thíos a choinneáil ar intinn agus tú ag ullmhú do ríomh cánach breisiúcháin:

1. Ioncam nó caillteanas cáilitheach gach eintiteas sa ghrúpa a chinneadh.
2. Sainaithin na cánacha atá clúdaithe, agus na cánacha coigeartaithe atá clúdaithe, do gach eintiteas sa ghrúpa.
3. Ríomh an ráta cánach éifeachtach (ETR) dlínse d'eintitis Cholún a Dó.
4. Smaoinigh ar an gcaoi a bhféadfadh an t-eisiamh ioncaim bunaithe ar shubstaint tionchar a imirt ar aon ioncam cáilitheach dlínse agus cáin bhreisiúcháin.
5. Sainaithin na cánacha breisiúcháin i gColún a Dó a bhféadfadh gach eintiteas a bheith faoi dhliteanas ina leith.
6. Sainaithin an t-eintiteas tíolactha do gach cáin bhreisiúcháin.  

Comhlíontacht

Mar eintiteas laistigh den raon feidhme, ní mór duit clárú do na cánacha ábhartha i gColún a Dó. Ní mór duit clárú laistigh de 12 mhí ó dheireadh na chéad bhliana fioscacha a bhfuil tú faoi réir na cánach ina leith.

Má theipeann ort clárú, féadfaidh sé go ndlífear pionós €10,000 a ghearradh ort. Chun tuilleadh eolais a fháil maidir le clárú le haghaidh cánacha Colún a Dó, féach Clárú do Cholún a Dó.

Nuair atá clárúcháin Cholún a Dó á gcomhlánú, d'fhéadfadh grúpaí MNE agus grúpaí mórscála intíre a mheas gur cuí grúpa CBNC nó grúpa RÍFTC a bhunú. Ligfidh sé seo don ghrúpa leas a bhaint as próisis shimplithe tíolactha agus íocaíochta cánach. Chun tuilleadh eolais a fháil maidir le tíolacthaí agus íocaíochtaí cánach, féach Íoc agus Tíolaic le haghaidh Colún a Dó.

Tá tuairisceáin chánach agus oibleagáidí íocaíochta de chuid Cholún a Dó Intíre dlite laistigh de 15 mhí ó dheireadh na bliana fioscach. Síntear an tréimhse seo go dtí 18 mí don chéad bhliain fhioscach a bhfuil tú faoi raon feidhme. Chun tuilleadh eolais a fháil, féach Íoc agus Tíolaic le haghaidh Colún a Dó.

Tá an tuairisceán faisnéise cánach breisiúcháin dlite laistigh de 15 mhí ó dheireadh na bliana fioscach. Síntear an tréimhse seo go dtí 18 mí don chéad bhliain fhioscach a bhfuil tú faoi raon feidhme. Le haghaidh tuilleadh eolais, féach ar Tuairisceán faisnéise cánach breisiúcháin.