Céard a tharlaíonn mura gcomhlíonann tú d'oibleagáidí?
Cuirfear pionóis i bhfeidhm mura gcomhlíonann tú do dhualgais Cánach ar Thithe Folmha (CTF) ina n-iomláine. Ina measc seo, áirítear:
- formhuirear
- pionós
- agus
- ús ar íocaíocht dhéanach CTF.
Ní mór duit do Thuairisceán CTF a thíolacadh ar an 7 Samhain tar éis dheireadh na tréimhse inmhuirir.
Formhuirear as Tuairisceán CTF a thíolacadh go déanach
Beidh formhuirear i bhfeidhm mura ndéanann tú Tuairisceán CTF ceart a thíolacadh faoin dáta dlite. Beidh formhuirear i bhfeidhm freisin má thíolacann tú Tuairisceán CTF faoin dáta dlite, ach níl sé ceart.
Is é suim an fhormhuirir ná:
- 5% den CTF iníoctha, má thíolactar tuairisceán ceart laistigh de 2 mhí ón dáta dlite
- nó
- 10% den CTF iníoctha, sa chás nach ndéantar tuairisceán ceart a thíolacadh laistigh de 2 mhí ón dáta dlite.
Tá an formhuirear seo ar bharr an muirear iarbhír CTF, móide aon ús a d’fhéadfadh teacht aníos mar gheall ar íocaíocht dhéanach.
Pionós as loiceadh Tuairisceán CTF a thíolacadh faoin dáta dlite
Féadfaidh na Coimisinéirí Ioncaim pionós a ghearradh má theipeann ort Tuairisceán CTF ceart a thíolacadh faoin dáta dlite.
Braithfidh cineál an phionóis agus suim an phionóis ar chúinsí sonracha gach cás.
Ús ar íocaíochtaí déanacha CTF
Ní mór duit do mhuirear CTF a íoc ar nó roimh 1 Eanáir tar éis dheireadh na tréimhse inmhuirir. Chun tuilleadh eolais a fháil ar dhátaí dlite íocaíochta, féach Céim 6: Deimhnigh do shocraíochtaí íocaíochta.
Cuirfear ús i bhfeidhm ar gach lá nó cuid de lá a bhfuil an muirear CTF amuigh, gan íoc. Is é an ráta úis ná 0.0219% in aghaidh an lae, arb ionann é agus 8% in aghaidh na bliana. Ní mór aon ús dlite a bheith curtha san áireamh le gach íocaíocht amuigh i leith CTF.