Cáin Chláraithe Feithiclí (CCF)

Plátaí clárúcháin agus formáid chaighdeánach

Nuair a chláraítear feithicil ag ionad de chuid an SNTC, eiseofar uimhir chláraithe. Ligeann sé seo duit do uimhirphlátaí a fháil. Ní mór iad seo a thaispeáint ar thosach agus ar chúl na feithicle agus a bheith infheicthe go soiléir i gcónaí. I gcás feithiclí nach bhfuil ach roth amháin chun tosaigh acu, amhail gluaisrothair, ní fhéadann siad pláta a thaispeáint ach amháin ar chúl na feithicle.

Ní sholáthraíonn na Coimisinéirí Ioncaim plátaí clárúcháin. Féadtar iad seo a fháil ó fhoinse ar bith fad is atá siad faoi réir na gcaighdeán riachtanach.

Ní mór d'uimhirphlátaí dianchaighdeáin fhormáide agus méide dlíthiúla a chomhlíonadh. Bíonn fíneáil suas le €5,000 i gceist má thaispeántar plátaí nach gcomhlíonann na caighdeáin riachtanacha.

Cláruimhir a chur in áirithe

Ar €1,000, féadtar iarratas a dhéanamh chuig na Coimisinéirí Ioncaim ar uimhir chláraithe áirithe don bhliain reatha.

Chun uimhir a chur in áirithe, ní mór duit iarratas a dhéanamh chuig an tSeirbhís Náisiúnta CCF. Ní mór iarratas a dhéanamh ar an 1 Samhain, nó ina dhiaidh sin sa bhliain roimh a bhfuil sé ar intinn an fheithicil a chlárú don chéad uair.

Mura n-éiríonn le d’iarratas, aisíocfar d’íocaíocht €1,000 leat.

Ní mór don uimhir agus don chontae roghnaithe:

• a bheith sa ghnáthfhormáid chláruimhreach,
• teacht leis an mbliain agus an leathbhliain inar cláraíodh an fheithicil den chéad uair,
• agus
• teacht leis an áit ina gcónaíonn an t-iarratasóir de ghnáth.

Ní mór gurb é an t-úinéir cláraithe an duine atá an uimhir curtha in áirithe ina ainm. Ní uimhreacha inaistrithe iad uimhreacha in áirithe.

Tá gach cláruimhir ar fáil le cur in áirithe ach amháin an uimhir ‘1’ i gCorcaigh, i mBaile Átha Cliath, i Luimneach agus i bPort Láirge.

Ní fhéadtar cláruimhir in áirithe a shannadh d’fheithicil go dtí go sroichtear í sa ghnáthsheicheamh. Ní fhéadtar í a thaispeáint ar fheithicil go dtí go mbeidh sí sannaithe go foirmiúil ag na Coimisinéirí Ioncaim.

Ba chóir iarratais le haghaidh cláruimhreacha a chur in áirithe a sheoladh chuig an tSeirbhís Náisiúnta CCF, trí M'Fhiosruithe.

Formáid plátaí clárúcháin

Sonraítear in I.R. Uimhir 318 de 1992 an formáid, toisí agus na sonraíochtaí teicniúla de chláruimhreacha atá le léiriú ar mhótarfheithiclí.

Ní mór an pláta clárúcháin a bheith comhdhéanta de:

• uimhreacha agus litreacha dubha ar chúlra bán frithchaiteach
• ainm chontae an chlárúcháin i nGaeilge ag barr an phláta
• bratach an Chomhphobail Eorpaigh. Ní mór gurb ionann é seo agus dhá réalta dhéag i gciorcal agus na litreacha IRL i mbán ar chúlra ghorm frithchaiteach. Ní mór go mbeidh an bratach le feiceáil ar thaobh na láimhe clé den phláta.

Níor chóir aon uimhreacha, litreacha ná marcanna eile a bheith le feiceáil ar an bpláta.

Feithiclí cláraithe roimh 31 Nollaig 2012

Beidh an fhormáid BB - Contae - uimhir sheicheamhach i bhfeidhm ar gach feithicil a cláraíodh roimh 31 Nollaig 2012. Baineann sé seo le feithiclí a cláraíodh in Éirinn nó i dtír eile.

Sampla: Maidir le carranna a iompórtáladh in 2017 agus a cláraíodh den chéad uair sa Ríocht Aontaithe in 2011, clárófar iad mar 11-xx-xxxx.

Feithiclí cláraithe ó 1 Eanáir 2013

Beidh an fhormáid BB[1 nó 2] - Contae - uimhir sheicheamhach i bhfeidhm ar gach feithicil a cláraíodh ó 31 Nollaig 2013. Baineann sé seo le feithiclí a cláraíodh in Éirinn nó i dtír eile. Tá an bhliain scartha ina dhá leath chun críocha clárúcháin. Baineann BB1 le feithiclí cláraithe idir 1 Eanáir agus 30 Meitheamh. Baineann BB2 le feithiclí cláraithe idir 1 Iúil agus 31 Nollaig.

Feithiclí nach n-astaíonn astaíochtaí sceithphíopa CO2

Ón 1 Iúil 2025 i leith, tá gach feithicil nach n-astaíonn astaíochtaí sceithphíopa CO2 incháilithe le haghaidh pláta clárúcháin le "splanc" ghlas. Breathnaíonn na plátaí clárúcháin mar an gcéanna le plátaí atá ann cheana, ach le stríoc ghlas breise.

Níl na plátaí clárúcháin le "splanc" ghlas éigeantach. Má tá feithicil leictreach agat cheana féin, féadtar d'fheithicil a iarfheistiú le pláta clárúcháin le stríoc ghlas air.

Ar aghaidh: Clárúcháin ZZ, feithiclí seanré agus plátaí ZV