Cáin Chláraithe Feithiclí (CCF) a ríomh

An luach a mheasúnú

I gcás fheithiclí chatagóir A agus an chuid is mó d’fheithiclí chatagóir B, baintear úsáid as luach na feithicle nuair atá an CCF dlite á ríomh. Tugtar an Praghas Díola ar an Margadh Oscailte (PDMO) ar an luach seo. Tá sé seo beagán éagsúil ó luach sonraisc feithicle.

An t-áireamhán CCF

Féadtar PDMO na bhfeithiclí is coitianta agus meastachán ar an gcáin dlite a fháil ar an Áireamhán CCF. Cé go bhfuil breis agus 25,000 luacháil ar an áireamhán CCF, níl gach feithicil ann.

Is iondúil go dtabharfaidh an t-áireamhán CCF meastachán maith ar an CCF atá dlite má tá feithicil áirithe á clárú ar an lá céanna. Níl anseo ach meastachán, áfach. Ní ríomhann na Coimisinéirí Ioncaim an tsuim chruinn CCF dlite ach amháin nuair a thugtar feithicil i láthair lena clárú.

Leis an tseirbhís áireamháin CCF, féadtar suim na CCF dlite a mheas i leith cairr, feithicil bheag tráchtála nó gluaisrothar. Féadtar an tseirbhís seo a úsáid chomh maith chun meastachán a fháil ar aon aisíocaíocht CCF a fhéadann a bheith dlite nuair atá carr á easpórtáil agat.

Tabhair do d’aire nach bhféadtar an t-áireamhán seo a úsáid le haghaidh:

• múnlaí nár tugadh i láthair roimhe seo le haghaidh luachála
• múnlaí a dteastaíonn taighde speisialta le hiad a luacháil. Folaíonn siad seo mótarcharbháin, feithiclí clasaiceacha agus feithiclí luachmhara, agus déanaimh áirithe ardghradaim
• feithiclí móra tráchtála, tarracóirí talmhaíochta, busanna agus feithiclí móra eile de bhrí mbíonn siad seo faoi réir muirear seasta CCF go ginearálta
• Cáin Bhreisluacha (CBL) ar mhodh iompair nua. Chun críocha CBL, is modh iompair nua iad an chuid is mó de mhótarfheithiclí sa chás gur feithiclí iad atá níos lú ná 6 mhí d’aois NÓ a thaisteal níos lú ná 6,000km.

An méid a theastaíonn chun an tseirbhís a úsáid

Chun an tseirbhís seo a úsáid, is gá cód staitistiúil a bheith agat, nó gach ceann den mhéid seo a leanas:

• aicmiúchán AE.
• Déanamh na feithicle.
• Múnla na feithicle.
• Cineál an tarchurtha.
• Líon na ndoirse.
• Cineál an innill.
• Cineál na cabhlach.
• Méid an innill.
• Leagan.
• Míleáiste.
• Bliain agus mí an chéad chlárúcháin in aon dlínse.
• astuithe CO2^[1].
• astuithe NOx.

PDMO a dheimhniú

Mura bhfuil feithicil ar an áireamhán, déanfaidh na Coimisinéirí Ioncaim a PDMO a dheimhniú, ach ní dhéanfaidh muid é sin go dtí tar éis í a bheith tugtha i láthair lena clárú. Baineann na Coimisinéirí Ioncaim úsáid as táscairí margaidh amhail treoirleabhair trádála Éireannacha, fógraí, agus saineolaithe.

Ní thugann foireann na gCoimisinéirí Ioncaim meastacháin ar luach nó cáin dhlite i leith feithiclí nár tugadh i láthair lena gclárú.

Mura bhfuil feithicil ar an liosta, agus má theastaíonn meastachán PDMO roimh í a cheannach, ní mór duit ansin do chuid taighde féin a dhéanamh. Féadtar an Fhoirm meastacháin CCF a úsáid le haghaidh déanaimh nach ndáiltear go coitianta in Éirinn.

Fachtóirí eile a bhfuil tionchar acu ar an PDMO

Chun críocha CCF, féadtar feithiclí a rátáil mar ‘maith’, ‘measartha’ nó ‘go dona’. Go hiondúil, déantar an chuid is mó d’fheithiclí a rátáil mar ‘maith’. Má bhreithnítear feithicil le rátáil ‘measartha’ nó ‘go dona’, féadfaidh sé seo an CCF atá dlite a laghdú.

I gcás míleáiste atá i bhfad níos airde ná ‘gnáis’ a bhfuil glacadh leo, d’fhéadfadh sé seo an CCF atá dlite a laghdú. Is é 2,100km le haghaidh feithiclí díosail agus 1,500km le haghaidh gach feithicil eile an gnáth-mheánmhíleáiste míosúil a nglacann na Coimisinéirí Ioncaim leis.

[1] Más mian leat figiúr eile CO2 a chur ar fáil seachas an ceann a chuir na Coimisinéirí Ioncaim ar fáil.

Ar aghaidh: CCF breise