Faoiseamh cánach ar thabhartais chuig comhlachtaí áirithe spóirt

Conas faoiseamh cánach a éileamh ar thabhartais

Tabhartais ó dhaoine aonair

Féadtar, mar chomhlacht spóirt ceadaithe nó mar Chomhlacht Rialaithe Náisiúnta (CRN), faoiseamh cánach a éileamh ar thabhartais a dhéanann daoine aonair agus a údaraíonn siad. Ciallaíonn duine aonair chun na críocha seo:

• duine a íocann cáin faoin gcóras Íoca Mar a Thuillir (ÍMAT)
• nó
• duine a íocann cáin faoi fhéinmheasúnú, nó atá faoin mbonn measúnaithe comhpháirtigh le céile nó páirtnéir sibhialta a íocann cáin faoi fhéinmheasúnú.

Ní fhéadtar an faoiseamh cánach a éileamh mura n-údaraíonn an duine aonair a thugann an tabhartas duit é sin a dhéanamh.

Chun d’éileamh a dhéanamh, ní mór duit:

• Foirm SPR1 a iarraidh ón deontóir, más comhlacht spóirt ceadaithe thú
• nó
• Foirm SPR2 a iarraidh ón deontóir, más CRN thú
• agus
• comhlánaigh Foirm 847A agus cuir isteach í ag baint úsaide as M'Fhiosruithe i Seirbhís ar Líne na gCoimisinéirí Ioncaim (ROS) le haghaidh éilimh suas go dtí an bhliain 2024, an bhliain sin san áireamh. Ní fhéadtar éilimh ar thabhartais a dhéantar an 1 Eanáir 2025 nó dá éis a thíolacadh go dtí an 1 Nollaig 2026, nó dá éis. Cuirfear tuilleadh sonraí ar fáil go luath faoi conas é sin a dhéanamh.

Tabhair do d'aire

Chun tabhartas a cháiliú le haghaidh faoiseamh cánach, ní leor a bheith ina chomhlacht ceadaithe spóirt. Ní mór duit freisin tionscadal ceadaithe a bheith agat, nó tionscadal cáilitheach, de réir mar is cuí.

Sampla

Ríomhtar an faoiseamh tríd an tabhartas a ollardú ag an ráta cánach íoctha an duine aonair. Ní fhéadann suim na haisíocaíochta a bheith níos mó ná an tsuim chánach a d’íoc an deontóir don bhliain chéanna.

Tugann Seán tabhartas €600 do chomhlacht ceadaithe spóirt in 2024. Tá tionscadal ceadaithe ag an gcomhlacht ceadaithe spóirt do 2024. Tá sé údaraithe ag Seán aisíocaíocht a éileamh i leith na cánach a d’íoc Seán.

I 2024, d’íoc John an t-ardráta cánach 40%. Ciallaíonn sé seo gurb ionann an tabhartas €600 agus 60% den tabhartas iomlán.

Chun an faoiseamh a ríomh, déantar an tabhartas iomlán a ollardú mar seo a leanas: (€600÷60)x100 = €1000.

Is í suim an fhaoisimh a fhéadann an comhlacht ceadaithe a éileamh ná (€1000-€600) €400.

Nuair a bheidh an deimhniú cuí comhlánaithe ag Seán, féadfaidh an comhlacht ceadaithe spóirt an aisíocaíocht a éileamh.

Murar íoc Seán ach €350 de cháin in 2024, is í an tsuim uasta den aisíocaíocht a fhéadann an comhlacht ceadaithe spóirt a éileamh ná €350.

Tabhartais ó chuideachtaí

Ní féidir le comhlacht ceadaithe spóirt faoiseamh cánach a éileamh ar tabhartais ó chuideachta. Ba chóir don chuideachta an tabhartas a éileamh mar chostas agus a n-ioncam nó a mbrabús iomlán á ríomh. Sa chás seo, níl aon socrú comhlán ann.

Ní féidir leis an gcuideachta an costas a éileamh nuair nach bhfuil aon tionscadal ceadaithe, nó cáilitheach, ann, de réir mar is cuí.

Admhálacha

Ní mór duit admháil a chur ar fáil do gach deontóir a thugann tabhartais, cibé acu atá siad ag tabhairt a bhfaoiseamh cánach don chomhlacht spóirt nó nach bhfuil.

Ní mór an t-eolas seo a leanas go léir a bheith san áireamh san admháil:

• Ainm agus seoladh an duine aonair nó an chomhlachta a thugann an tabhartas.
• Suim an tabhartais.
• Dáta a rinneadh an tabhartas.
• Ainm an chomhlachta cheadaithe spóirt a fuair an tabhartas.
• Uimhir Cluichí agus Spóirt (CS) an chomhlachta cheadaithe spóirt a fuair an tabhartas.
• Uimhir tionscadail cheadaithe, nó uimhir tionscadail cháilitheach, de réir mar is cuí.
• Síniú an oifigigh údaraithe.

Ní mór dáta agus síniú a bheith ar an admháil. Ní mór go sonraítear ar an admháil go ndearnadh an tabhartas i ndáil leis an tionscadal ceadaithe sonraithe nó tionscadal cáilitheach.

Ar aghaidh: Céard iad na taifid atá ort a choinneáil?