Iarratas a dhéanamh ar an dreasacht um Chabhair le Ceannach (CLC)

Leis an tseirbhís ar líne CLC, féadtar cur isteach ar an dreasacht CLC, más rud é gur ceannaitheoir céaduaire incháilithe thú. Leis seo chomh maith, féadtar éileamh a dhéanamh ar aisíocaíocht Cánach Ioncaim agus Cánach Coinneála ar Ús Taisce (DIRT) atá íoctha agat. Féadtar an aisíocaíocht seo a éileamh i gcás aon cheann de na ceithre bliana cánach roimhe seo.

Cé dó an tseirbhís seo?

Tá an tseirbhís seo oiriúnach duit: 

• Más ceannaitheoir céaduaire thú
• agus
• má dhéanann tú teach nó árasán a cheannach, nó a fhéin-tógáil, tráth ar bith idir 1 Eanáir 2017 agus 31 Nollaig 2025.

An méid a theastaíonn chun an tseirbhís a úsáid

Más cáiníocóir Íoc Mar a Thuillir (ÍMAT) thú, ní mór tuairisceán Cánach Ioncaim a bheith tíolactha agat. Ní mór chomh maith Ráiteas Dliteanais a bheith agat le haghaidh gach aon cheann de na blianta a bhfuil sé i gceist agat aisíocaíocht chánach a éileamh ina leith.

Más cáiníocóir féinmheasúnaithe thú, ní mór duit a bheith go hiomlán comhlíontach ó thaobh na cánach de. Ciallaíonn sé seo nach mór íocaíocht agus tíolacadh a bheith déanta agat le haghaidh gach aon cheann de na blianta cánach ina raibh tú faoi dhliteanas cánach. Ní mór chomh maith Deimhniú Imréitigh Cánach a bheith agat.

Más tógáil nua atá á ceannach agat, ní mór duit a chinntiú gur conraitheoir cáilitheach é an conraitheoir. Ní fhéadann ach conraitheoirí cáilitheacha d’éileamh CLC a cheadú. 

Féadtar tuilleadh eolais a fháil ar an gcaoi le hiarratas a dhéanamh sa rannán 'Cabhair le Ceannach'.

Cén chaoi le teacht ar sheirbhís ar líne na dreasachta CLC

Chun teacht ar an tseirbhís seo trí moChúrsaí, ar an gcárta ‘Seirbhísí Talún agus Maoine’, cliceáil ar ‘Cabhair le Ceannach’. 

Chun teacht ar an tseirbhís seo trí Sheirbhís ar Líne na gCoimisinéirí Ioncaim (ROS), ar an leathanach baile ROS cliceáil ar an gcárta ‘Nasc iarratasóra Cabhair le Ceannach’.