Soláthairtí laistigh den Chomhphobal (ICS)
Céard is triantánú ann?
Is éard atá i gceist le triantánú ná dhá sholáthar earraí idir triúr trádálaithe atá cláraithe le haghaidh Cáin Bhreisluacha (CBL) i dtrí Bhallstát éagsúla den Aontas Eorpach (AE).
Tá beart simpliúcháin ann laistigh den dlí CBL chun an t-ualach riaracháin agus comhlíontachta ar thrádálaithe agus ar na húdaráis chánach a bhfuil baint acu le hidirbhearta triantánacha den chineál sin a laghdú. Ní fhéadann an beart simpliúcháin seo oibriú, áfach, ach amháin nuair a bhíonn an triúr trádálaithe cláraithe le haghaidh CBL san Aontas Eorpach.
Go ginearálta, is mar seo a leanas a oibríonn an beart simpliúcháin:
- Déantar soláthar nialas-rátaithe laistigh den Chomhphobal ó chomhlacht A go comhlacht B.
- Cláraítear an soláthar ar thuairisceán ar an gcóras malartaithe faisnéise CBL (VIES) mar sholáthar ó chomhlacht A go comhlacht B.
- Ós rud é go bhfuil a uimhir CBL luaite ag comhlacht B, tá fáltas laistigh den chomhphobal (ICA) déanta aige. Tugann comhlacht B cuntas i leith an ICA seo ar a thuairisceán CBL.
- Déanann comhlacht B soláthar saor ó CBL ansin le comhlacht C. Tugann Comhlacht B le fios ar a sonrasc do Chuideachta B go bhfuil an socrú triantánach simplithe á chur i bhfeidhm. Tugann Comhlacht C cuntas i leith an idirbhirt seo ina thuairisceán CBL mar sholáthar a fuarthas. Ar an gcaoi seo, meastar cuntas a bheith tugtha ag Comhlacht C i leith dhliteanas CBL chomhlacht B i mBallstát 3.
Nuair a bheidh comhlacht C i dteideal CBL a aiséileamh, tógann sé creidmheas comhuaineach don idirbheart seo sa tuairisceán cuí CBL.

Idirbhearta a bhfuil níos mó ná trí chomhlacht i gceist leo
Ní fhéadtar an beart simpliúcháin a oibriú ach amháin sa chás tipiciúil triantánachta mar atá leagtha amach thuas. Sa chás go bhfuil níos mó ná trí chomhlacht i gceist (m.sh. díola i ndiaidh a chéile idir comhlachtaí i mBallstát 2), caithfear an bealach beacht dlíthiúil a leanúint. Sna cásanna seo, féadfaidh sé go dteastódh clárúchán i mBallstát amháin eile ar a laghad, ag brath ar na cúinsí ar leith.
Ar aghaidh: Fianaise a theastaíonn le hearraí a sholáthar laistigh den Chomhphobal