Cáin d'fhostaithe a íoc leis na Coimisinéirí Ioncaim

Cáin a íoc leis na Coimisinéirí Ioncaim

Tabhair do d’aire

Baineann an t-eolas ar an leathanach seo le dualgais reatha an fhostóra. Chun eolas ar dhualgais an fhostóra roimh an 1 Eanáir 2019 a fháil, féach ar an Employers Guide to PAYE.

Is é Rannóg an Ard-Bhailitheora sna Coimisinéirí Ioncaim a bhailíonn na cánacha uile a asbhaineann fostóirí. Ní mór d'fhostóirí na dliteanais chánach seo a leanas a íoc gach mí:

• Cáin Ioncaim 
• Árachas Sóisialach Pá-Choibhneasa (ÁSPC)
• Muirear Sóisialach Uilíoch (MSU)
• Cáin Mhaoine Áitiúil (CMÁ), más infeidhme.

Íocaíochtaí míosúla

Cruthóidh na Coimisinéirí Ioncaim ráiteas míosúil a bheidh ar fáil don fhostóir faoin 5ú lá den mhí ina dhiaidh. Léireofar ar an ráiteas seo dliteanas cánach iomlán an fhostóra don mhí tagartha bunaithe ar a dtíolacthaí párolla le linn na míosa sin.

Féadfaidh an fostóir glacadh leis an ráiteas faoin 14ú den mhí ina dhiaidh agus is ansin a éiríonn sé de bheith ina thuairisceán reachtúil míosúil don fhostóir. Mura nglacann an fhostóir leis an ráiteas faoin 14ú, measfaidh na Coimisinéirí Ioncaim, ar an lá sin, gurb é sin tuairisceán reachtúil míosúil an fhostóra.

Ní mór don fhostóir an dliteanas iomlán a íoc taobh istigh de:

• 14 lá tar éis dheireadh gach míosa
• nó
• 23 lá tar éis dheireadh na míosa, má thíolacann an fostóir an tuairisceán agus má íocann sé an cháin ar Sheirbhís ar Líne na gCoimisinéirí Ioncaim (ROS).

Íocaíochtaí ráithiúla

Más ionann iomlán na n-íocaíochtaí Cánach Ioncaim, ÁSPC agus MSU an fhostóra don bhliain agus €28,800 nó níos lú, féadtar iarratas a dhéanamh chun na híocaíochtaí a dhéanamh go ráithiúil.

Má cháilíonn an fostóir, ba cheart dó iarratas a dhéanamh le Rannóg an Ard-Bhailitheora don rogha seo. Chun iarratas a dhéanamh, ní mór don fhostóir a bheith cláraithe mar fhostóir le 12 mhí ar a laghad agus a chuid tuairisceáin agus íocaíochtaí uile a bheith tíolactha aige.

Má dhéannn an fostóir íocaíochtaí go ráithiúil:

• ní mór tíolacadh párolla a thíolacadh gach uair a íoctar a gcuid fostaithe
• agus
• féadtar glacadh leis an ráiteas a eisíonn na Coimisinéirí gach mí, a éiríonn ansin de bheith ina thuairisceán reachtúil míosúil.

Modhanna íocaíochta

Is féidir le fostóir ROS nó moChúrsaí a úsáid chun a ndliteanas cánach a íoc ar líne.

Má íocann an fostóir a ndliteanas cánach tar éis an dáta dlite, gearrfaidh na Coimisinéirí Ioncaim ús ar an bhfostóir ón 14ú den mhí.

Is é an ráta úis ná 0.0274% le haghaidh gach lá atá an íocaíocht déanach.

Ar aghaidh: Cáin a íoc ar mhionsochair agus sochair neamhrialta de chuid fostaí