Díolúine chánach do charthanais
Díolúine chánach do charthanais a tharraingt siar
Déanfar díolúine chánach do charthanais a tharraingt siar sa chás go bhfuil carthanas:
- á bhfoirceannadh
- faoi leachtú
- neamhchláraithe leis an Rialálaí Carthanas
- nó
- nuair is cuideachta theoranta an carthanas agus tá an Oifig um Chlárú Cuideachtaí (CRO) tar éis é a dhíscaoileadh.
Eiseoidh Na Coimisinéirí Ioncaim deimhniú i scríbhinn más rud é gur tarraingíodh siar an díolúine chánach sin.
Cén uair a d'fhéadfadh sé nach mbeidh feidhm ag an díolúine chánach a thuilleadh?
Féadfaidh sé go gcinnfidh na Coimisinéirí Ioncaim nach bhfuil feidhm ag an díolúine chánach a thuilleadh más rud é:
- nach bhfuil do charthanas i dteagmháil leis na Coimisinéirí Ioncaim. Mar shampla, tá dliteanas cánach amuigh ag do charthanas nó níor chuir sé cuntais nó doiciméid eile ar fáil mar a iarrtar
- Nach bhfuil do charthanas in ann leanúint ar aghaidh lena chuspóir carthanúil agus tá gníomhaíochtaí scortha ag an gcarthanas
- nó
- nuair a chinneann Na Coimisinéirí Ioncaim nach gcáilíonn an carthanas don díolúine chánach a thuilleadh.
Sna cúinsí seo, eiseoidh na Coimisinéirí Ioncaim fógra i scríbhinn ina leagfar amach na cúiseanna le díolúine chánach a tharraingt siar. Beidh 21 lá agat chun na doiciméid tacaíochta a chur ar fáil maidir le d’éileamh ar dhíolúine chánach. Má chinneann na Coimisinéirí Ioncaim, tar éis an phróisis seo, go bhféadtar leanúint ar aghaidh leis an díolúine chánach, deimhneofar é seo duit i scríbhinn.
Eiseoidh na Coimisinéirí Ioncaim cinneadh foirmiúil i leith an díolúine chánach a tharraingt siar más rud é, tar éis 21 lá:
- nach bhfuil teagmháil déanta agat leis na Coimisinéirí Ioncaim
- nár chuir tú an eolas a iarradh ar fáil
- nó
- tar éis faisnéis bhreise a fháil, tá sé fós den tuairim ag na Coimisinéirí Ioncaim gur chóir an díolúine chánach a tharraingt siar.
Fógraí don Rialálaí Carthanas
Cuirfidh na Coimisinéirí Ioncaim in iúl don Rialálaí Carthanas más rud é gur tarraingíodh siar do dhíolúine chánach.
Achomharc a dhéanamh ar chinneadh i leith díolúine chánach a tharraingt siar
Féadtar achomharc a dhéanamh in aghaidh cinneadh na gCoimisinéirí Ioncaim i leith díolúine chánach a tharraingt siar trí achomharc a dhéanamh go díreach leis An gCoimisiún um Achomhairc Chánach. Ní mór an t-achomharc a dhéanamh taobh istigh de 30 lá ó eisíodh cinneadh foirmiúil na gCoimisinéirí Ioncaim.