Cánachas ar scaireanna a bhaineann le fostaíocht
Pleananna Ceannaithe Scaireanna d'Fhostaithe (PCSF)
Feidhmíonn go leor cuideachtaí, go háirithe fochuideachtaí nó brainsí de chorparáidí na Stát Aontaithe (SAM) PCSF.
Is bealach duitse é ESPP chun scaireanna a cheannach i do chuideachta trí asbhaintí párolla, ar praghas lascainithe in amanna. Go hiondúil, an lascaine a cheadaítear ná 15% de luach margaidh na scaireanna ar cheann de na dátaí seo:
- an chéad lá de thréimhse na tairisceana
- nó
- an lá deiridh de thréimhse na tairisceana.
Cuirtear an lascaine i bhfeidhm ar an luach margaidh ar cibé lá a bhí an luach níos ísle. Tréimhse 6 mhí is ea an tréimhse tairisceana go hiondúil.
Na príomhghnéithe
Nuair a chláraíonn tú sa phlean, baileoidh do chomhlacht do ranníocaíochtaí párolla chun scaireanna a cheannach ar dháta sonrach.
Go ginearálta, beidh uaschéatadán tuarastail a fhéadtar a infheistiú sa phlean. Is tusa a chinneann cé mhéid den tuarastal glan a theastaíonn uait a chur i dtreo an phlean. Beidh an tsuim chéanna á cur agat leis gach mí ar feadh tréimhse 6 mhí. Coinníonn an chuideachta do chuid ranníocaíochtaí thar do cheann, de ghnáth i gcuntas neamhúsmhar. Ag deireadh na sé mhí, baintear úsáid as na ranníocaíochtaí chun scaireanna a cheannach duit.
Cánachas PCSF
Gearrfar cáin ort ar an lascaine a cheadaíonn an cuideachta mar shochar a díorthaíodh ó d’fhostaíocht. Is é an tsuim inmhuirir ná an difríocht idir an méid seo:
- luach margaidh na scaireanna nuair a cheannaítear iad thar do cheann
- agus
- an tsuim a íocann tú ar na scaireanna sin.
Íocfaidh tú Cáin Ioncaim, Muirear Sóisialach Uilíoch (MSU) agus Árachas Sóisialach Pá-Choibhneasta (ÁSPC) ar shuim na lascaine. Déanfaidh d’fhostóir na hasbhaintí cuí tríd an bpárolla agus íocfaidh an cháin go díreach leis an t-Ard-Bhailitheoir.
Tabhair do d’aire
Féadfaidh sé go ndréachtófar roinnt pleananna PCSF ar shlí go mbeadh siad ina bpleananna scair-roghanna. Braithfidh sé seo ar gach plean aonair.
Má fheidhmíonn tú scair-rogha roimh an 1 Eanáir 2024, ní mór duit sonraí faoi aon ghnóthachan a dhéanann tú a thuairisciú do na Coimisinéirí Ioncaim agus aon dliteanas Cánach Ioncaim a íoc go díreach. Ní bhainfidh d’fhostóir Cáin Ioncaim thar do cheann tríd an bpárolla.
Má fheidhmíonn tú scair-rogha ar an 1 Eanáir 2024 nó dá éis, asbhainfidh d'fhostóir aon dliteanas Cánach Ioncaim tríd an bpárolla.
Tugtar achoimre ar fhaisnéis faoi chóireáil scair-rogha neamhcheadaithe i Scéimeanna scair-rogha neamhcheadaithe.
- Sampla 1
Oibríonn Lucy do bhrainse Éireannach de chorparáid de chuid na SA. Faoi PCSF a fostóra féadfaidh sí scaireanna a cheannach sa chuideachta ar phraghas lascainithe de 85% den luach margaidh. Ní caitear leis an PCSF mar phlean scair-rogha.
Rátaí malartaithe €1 = $1.10.
Cuireann sí an tsuim céanna isteach gach mí ar feadh sé mhí, a bhfuil á choinneáil i gcuntas neamhúsmhar. Bhí scaireanna ag trádáil ag €54 ($60) ag tús na tréimhse tairisceana sé mhí ar an stocmhalartán. Ag deireadh na tréimhse tairisceana sé mhí tá siad ag trádáil ag €60 ($66).
Ag deireadh na sé mhí úsáidtear a chuid ranníocaíochtaí chun scaireanna a cheannach ag €46 in aghaidh na scaire (85% de €54). Ní mór di cáin a íoc ar shuim na lascaine de €14 in aghaidh na scaire (€60 lúide €46). Déanann a fostóir an asbhaint tríd an gcóras párolla.
Is é costas na fála chun críocha Cánach Gnóthachan Caipitiúil (CGC) ná €60 in an scair.
- Sampla 2
Oibríonn Liam do bhrainse Éireannach de chorparáid de chuid na SA. Faoi PCSF a fhostóra, tá sé de rogha aige scaireanna cuideachta a cheannach ar phraghas lascainithe ag deireadh na tréimhse ranníocaíochta. Is é an praghas lascainithe seo ná 85% den luach margaidh. Caitear leis an PCSF mar phlean scair-rogha.
Rátaí malartaithe €1 = $1.10.
Cuireann sé an tsuim céanna isteach gach mí ar feadh sé mhí, a bhfuil á choinneáil i gcuntas neamhúsmhar. Bhí scaireanna ag trádáil ag €100 ($110) ag tús na tréimhse tairisceana sé mhí ar an Stocmhalartán. Ag deireadh na tréimhse tairisceana sé mhí tá siad ag trádáil ag €120 ($132).
Ag deireadh na sé mhí roghnaíonn Liam a chuid ranníocaíochtaí a úsáid chun scaireanna a cheannach ag €85 an scair (85% de €100). Is gá dó cáin a íoc ar shuim na lascaine de €35 an scair (€120 lúide €85). Ní mór dó sonraí faoi aon ghnóthachan a rinne sé go díreach a thuairisciú do na Coimisinéirí Ioncaim agus aon dliteanas cánach dlite a íoc.
Is é costas na fála chun críocha CGC ná €120 in aghaidh na scaire.
Cáin Gnóthachan Caipitiúil (CGC)
Má dhiúscraíonn tú do chuid scaireanna, féadfaidh sé go mbeidh tú faoi dhliteanas CGC. Ní mór duit an diúscairt seo a thuairisciú do na Coimisinéirí Ioncaim, fiú mura bhfuil aon cháin dlite. Ní dhéanfaidh d’fhostóir aon cháin a asbhaint nó ní thuairisceodh d’fhostóir an diúscairt ar do shon.
Ar aghaidh: Scaireanna fáis (scaireanna toraidh nó borracha)