Cead isteach sealadach d'earraí áirithe le haghaidh díol féideartha
Saothair ealaíne, míreanna do bhailitheoirí agus seandachtaí
Féadtar na hearraí seo a leanas a iompórtáil faoi chead isteach sealadach le haghaidh taispeántais nó díol féideartha.
Saothair ealaíne, amhail:
- Pictiúir, colláisí agus plaiceanna maisiúla cosúla, péintéireachtaí agus léaráidí déanta go heisiach de láimh ag an ealaíontóir (seachas pleananna agus léaráidí chun críocha ailtireachta, innealtóireacht, tionsclaíocht, tráchtáil, topagrafach nó críocha comhchosúla), earraí monaraithe lámh-mhaisithe, radharcra amharclainne, cúlbhrait stiúideo nó a leithéid de chanbhás péinteáilte (Cód CN 9701).
- Bunghreanadh, bunphriontaí agus bunliteagraif (ar ionchlónna iad a táirgeadh i líon teoranta, go díreach i ndubh agus bán, nó daite, de phláta amháin nó plátaí iomadúla déanta go heisiach de láimh ag an ealaíontóir, is cuma an próiseas nó an t-ábhar a d’úsáid siad, ach gan próiseas meicniúil nó fótaimheicniúil san áireamh) (Cód CN 9702 00 00).
- Dealbha bunaidh agus dealbhóireacht d’aon chineál (ar an gcoinníoll go ndéantar iad go hiomlán ag an ealaíontóir), múnla dealbhóireachta a bhfuil a tháirgeadh teoranta do 8 gcóip agus arna mhaoirsiú ag an ealaíontóir nó ag comharbaí i dteideal an ealaíontóra (Cód CN 9703 00 00) ar bhonn eisceachtúil i gcásanna deimhnithe ag na Ballstáit (féadtar an teorainn ocht gcóip a shárú i gcás múnlaí dealbhóireachta a táirgeadh roimh 1 Eanáir 1989)
- Taipéisí (Cód CN 5805 00 00) agus teicstílí balla (Cód CN 6304 00 00) déanta de láimh ó dhearthaí bunaidh ag ealaíontóirí ar an gcoinníoll nach bhfuil níos mó ná 8 gcóip an ceann ann
- Píosaí aonair ceirmeachta déanta go hiomlán ag an ealaíontóir agus sínithe acu
- Cruain ar chopar, ar de láimh a rinneadh go hiomlán iad, atá teoranta do 8 gcóip uimhrithe ar a bhfuil síniú an ealaíontóra nó an stiúideo, gan seodearraí, earraí gaibhne óir ná earraí gaibhne airgid a áireamh
- Grianghraif tógtha ag an ealaíontóir, priontáilte acu nó faoina maoirseacht, sínithe agus uimhrithe agus teoranta do 30 cóip, gach méid agus feiste san áireamh.
Míreanna do bhailitheoirí, amhail:
- Stampaí poist nó stampaí na gcoimisinéirí ioncaim, postmharcanna, clúdaigh chéadlae, stáiseanóireacht réamhstampáilte agus a leithéidí, atá frainceáilte, nó má tá siad neamhfhrainceáilte nach de dhlíthairiscint iad agus nach mbeartaítear iad a úsáid mar dhlíthairiscint (Cód CN 9704 00 00)
- Bailiúcháin agus earraí bailitheoirí de shuim zó-eolaíochta, luibheolaíochta, mianraí-eolaíochta, staireolaíochta, seandálaíochta, pailé-eolaíochta, eitneagrafach nó moneolaíochta (Cód CN 9705 00 00).
Seandachtaí amhail:
Rudaí seachas saothair ealaíne agus míreanna do bhailitheoirí atá breis agus 100 bliain d’aois (Cód CN 9706 00 00).
Tuilleadh eolais
Má tá tuilleadh eolais uait, déan teagmháil leis an Aonad um Údaruithe agus Faoisimh.